રશિયન પ્રેસિડેન્ટ પુતિનનું ભારતમાં આગમન, PM મોદીએ એરપોર્ટ પર કર્યુ ઉષ્માભેર સ્વાગત

India-Russia Agreements : રશિયાના રાષ્ટ્રપતિ વ્લાદિમીર પુતિન ભારતની મુલાકાતે આવ્યા છે. પુતિન અને વડાપ્રધાન મોદી અનૌપચારિક મુલાકાત કરશે. 5 ડિસેમ્બરે બંને નેતાઓ વચ્ચે ઔપચારિક બેઠક અને તમામ મુખ્ય કરારો પર હસ્તાક્ષર થશે. આ દરમિયાન, 10 સરકારી અને 15થી વધુ વ્યાપારિક કરારો પર હસ્તાક્ષર કરવામાં આવશે. આનો અર્થ એ છે કે કુલ 25 મુખ્ય કરારો પર હસ્તાક્ષર થવાની અપેક્ષા છે. પુતિન 23મી ભારત-રશિયા વાર્ષિક સમિટમાં પણ હાજરી આપશે.

► પુતિનની ભારત યાત્રા દરમિયાન 7 મંત્રીઓ પણ સાથે

• રક્ષા મંત્રી આન્દ્રે બેલોસોવ
• કૃષિ મંત્રી ઓક્સાના લુત
• આરોગ્ય મંત્રી મિખાઇલ મુરાશ્કો
• પરિવહન મંત્રી આન્દ્રે નિકિતિન
• આર્થિક વિકાસ મંત્રી મેક્સિમ રેશેટનિકોવ
• નાણા મંત્રી એન્ટોન સિલુઆનોવ
• ગૃહ મંત્રી વ્લાદિમીર કોલોકોલ્ટસેવ

રશિયાના સેન્ટ્રલ બેંકના ગવર્નર એલ્વીરા નબીયુલિના અને નાયબ વિદેશ મંત્રી આન્દ્રે રૂડેન્કો પણ ભારતની મુલાકાતે આવી રહ્યા છે. ઇગોર સેચિન (રશિયન તેલ કંપની રોઝનેફ્ટના વડા) અને પ્રખ્યાત મીડિયા એડિટર માર્ગારીતા સિમોન્યાન સહિત અગ્રણી રશિયન ઉદ્યોગપતિઓ પણ ભારતની મુલાકાતે છે. પુતિન અને સિમોન્યાન ભારતમાં એક નવી ટીવી ચેનલ, RT ઇન્ડિયાના લોન્ચમાં ભાગ લેશે.

► કયા ક્ષેત્રોમાં થશે કરાર

વિદેશ મંત્રાલયના જણાવ્યા અનુસાર, આ મુલાકાત દરમિયાન કેટલાય ક્ષેત્રોમાં કરારો પર હસ્તાક્ષર થવાની અપેક્ષા છે - જેમાં વેપાર, અર્થતંત્ર, આરોગ્ય, શિક્ષણ, સંસ્કૃતિ, મીડિયા, શ્રમ અને શ્રમ ગતિશીલતા. રશિયામાં કામદારોની જરૂરિયાત વધી રહી છે. તેથી, ભારત અને રશિયા મળીને રશિયામાં ભારતીય કામદારો માટે સલામત અને સારી તકો પૂરી પાડવા માટે શ્રમ ગતિશીલતા કરાર કરશે. ભારત-રશિયા વેપારમાં ભારતની વેપાર ખાધ ઘટાડવા પર પણ ચર્ચા થશે, જેમાં ખાસ કરીને સંરક્ષણ અને ઉર્જા પર ધ્યાન કેન્દ્રિત કરવામાં આવશે. રશિયન રાષ્ટ્રપતિ કાર્યાલયના પ્રવક્તા દિમિત્રી પેસ્કોવે જણાવ્યું કે S-400 મિસાઇલ સિસ્ટમ અને Su-57 ફાઇટર જેટ ચર્ચાના મુખ્ય વિષયો હશે. બંને દેશો તેલ વેપારને સરળ અને સુરક્ષિત કરવા માટે સાથે મળીને કામ કરવા માંગે છે. તેમણે જણાવ્યું કે ભારત-રશિયા વેપાર $63 બિલિયન સુધી પહોંચી ગયો છે, અને 2030 સુધીમાં $100 બિલિયન સુધી પહોંચવાનું લક્ષ્ય છે.

► આંતરરાષ્ટ્રીય સંકેતો અને ભારતની વ્યૂહાત્મક સ્વાયત્તતા

નિષ્ણાતો માને છે કે રશિયા ભારતને ચીનના પ્રતિસંતુલન તરીકે જુએ છે. પુતિનની મુલાકાત ભારતની "વ્યૂહાત્મક સ્વતંત્રતા"ને વધુ મજબૂત બનાવે છે. આ મુલાકાત ફક્ત બંને દેશો વચ્ચેની ભાગીદારી નથી, પરંતુ એક મહત્ત્વપૂર્ણ ભૂ-રાજકીય સંકેત છે. ખાસ કરીને એવા સમયે જ્યારે વિશ્વ જૂથોમાં વિભાજીત થઈ રહ્યું છે અને પશ્ચિમી નીતિઓ "આપણી સાથે અથવા આપણી વિરુદ્ધ" ના સિદ્ધાંત પર ટકેલી છે. એવામાં ભારત વિશ્વને સંદેશ મોકલી રહ્યું છે કે તે હવે દબાણ હેઠળ નથી, પરંતુ પોતાની શરતો પર રમી રહ્યું છે, પછી ભલે તે યુદ્ધ વ્યૂહરચના હોય કે વૈશ્વિક રાજનીતિની ડિપ્લોમસી.

► પુતિન 28 કલાક નવી દિલ્હીમાં રહેશે

પુતિનની મુલાકાતની જાણકારી રાખતા અધિકારીઓએ જણાવ્યું હતું કે શુક્રવારે પુતિનનું ઔપચારિક સ્વાગત કરવામાં આવશે, ત્યારબાદ 23મી ભારત-રશિયા સમિટ થશે. તેમણે કહ્યું કે વડા પ્રધાન મોદી હૈદરાબાદ હાઉસ ખાતે પુતિન અને તેમના પ્રતિનિધિમંડળ માટે ભોજન સમારંભનું પણ આયોજન કરશે, અને પુતિન સવારે રાજઘાટની મુલાકાત પણ લેશે. સમિટ પછી પુતિન રશિયાના સરકારી પ્રસારકને ભારત ચેનલની શરૂઆત કરશે.

Home Page- gujju news channel - Latest Gujarati News, તાજા ગુજરાતી સમાચાર, Latest Gujarati News LIVE, Online Gujarati News, Gujarati news headlines today, Gujarati News Channel - India-Russia Agreements